赏樱伤情

最近几年，广州突然流行赏樱花。不但公园、植物园纷纷种植樱花树，郊区亦出现咗好多樱花种植基地，仲有政府部门出面举办樱花节。依家春节仲未到，公益性项目“中国樱花计划”首三件公共环境装置艺术作品已经立喺广州花城广场、越秀公园、广东外语外贸大学，向公众开放。

点解呢几年樱花喺广州咁受落呢？除咗广州人爱花嘅传统之外，我估，可能仲同樱花象征纯洁、希望有关，而且樱花嘅样似足桃花，而广州人特别偏爱桃花，因为桃花象征“大展宏图（桃）”，桃花睇多咗冇新意，就转而追求樱花了。

讲返转头，广州呢几年流行赏樱，我亦去睇过两次。一次喺从化，一次喺番禺大夫山，不过都令我好失望。我自细睇咗好多日本嘅动漫，里面嘅樱花树都非常高大，下边可以围好几围台，一阵风吹过，漫天花雨飘下，浪漫至极。但係广州嘅樱花，都只有两三米高，好多明显係临时移植过来嘅，花开得好稀疏。

广州天气炎热，本来就唔啱种樱花树，为咗实现广州人嘅赏樱愿望，主办方和园艺师肯定费咗唔少心思。但係，咁样夹硬布置出来嘅樱花林，效果唔见得几好。尤其係嗰啲临时种嘅樱花树，展完就要挖出来搬走，会唔会太劳民伤财呢？樱花同桃花相似，既然樱花咁难种，可唔可以改种桃花？起码对我而言，咁样袖珍嘅树，樱花桃花都无所谓，开得灿烂就得了。